आजचा विनोद

तू की तुझा भाऊ?

राम ठाकूर ‘शामा’ म्हणजे शाळा मास्तर असताना त्यांच्या वर्गात सुनीत आणि विनीत ही दोन जुळी मुले होती. ती दोघे अगदी सारखी दिसायची. त्यामुळे शामा ची म्हणजे मास्तरांची नेहमीच पंचाईत व्हायची. दोघांपैकी एकजण अकाली मरण पावला. काही दिवसांनी दुसरा शाळेत आला. तेव्हा या मास्तरांनी प्रश्‍न विचारला, ‘ अरे काय तुम्ही दोघे इतके सारखे दिसता की नेमका कोण ओळखताच येत नाही. तुमच्या दोघांपैकी एकजण मेला असे समजले. पण तू मेलास की तुझा भाऊ? तूच सांग.’
काय उत्तर द्यावे त्या मुलाने अशावेळी?
..........................................

आणि हाही विनोदच

तर अशा भोळ्या मास्तरांनी सध्या पनवेलमध्ये राहुल नार्वेकरांच्या खर्चातून जोरदार सभा घेण्याचे सत्र सुरू केले आहे. या सभेला येणारे सगळे लोक नार्वेकरांचे भरपूर कोडकौतुक करत आहेत. सभास्थानी गोरेगोमटे नार्वेकर सर्वांमध्ये उठून दिसत आहेत. नार्वेकरांचा प्रचार आपण करतो आहोत भासवत आहेत पण माघारी राष्ट्रवादीच्या नेत्यांना ते शिव्यांची लाखोली वहात आहेत.
    नार्वेकरांच्या प्रचाराला ज्यांच्याकडे जबाबदारी दिलेली होती ते शशिकांत शिंदे, प्रमोद हिंदुराव यांनी प्रचाराला येणे सोडून दिले आहे. त्यामुळे इच्छा नसतानाही वैतागुन राम ठाकूर आपल्या चिरंजीवांबरोबर जात आहेत. एकतर राष्ट्रवादीचे नेते प्रचाराला येत नाहीत. राष्ट्रवादीच्या उमेदवाराच्याच प्रचाराला येत नाहीत तर भविष्यात विधानसभा निवडणुकीत आपल्या चिरंजीवांच्या प्रचाराला ही लोकं काय येणार? या चिंतेने राम  ठाकूर यांना ग्रासलेले आहे. त्याचा परिणाम त्यांना ऐन प्रचारात भाषण करताना नेमके काय बोलावे सुचत नाही.
 काँग्रेसचे जे वक्ते आहेत त्यांना अन्य विषयांवर बोला असे सांगूनही ते पुन्हा पुन्हा नार्वेकरांच्या उच्चशिक्षणावर येतात. त्यामुळे जेव्हा शाम म्हात्रे, जी आर पाटील हे नेते उमेदवार उच्चशिक्षित आहेत त्यामुळे त्यांना मते द्या अशी मागणी करतात तेव्हा राम ठाकूर त्या वक्त्याकडे अगदी खाऊ की गिळू अशा भावनेने बघतात. कारण शेजारी आपले अर्धवट शिक्षण झालेले चिरंजीव बसलेले असतात. सहाच महिन्यांनी विधानसभा निवडणुका आहेत. आत्ता जर आपण नार्वेकरांच्या उच्च शिक्षणाबाबत बोलत बसलो तर विधानसभेला आम्हालाही पनवेलला उच्चशिक्षित आमदारच पाहिजे. प्रशांत ठाकूर यांच्याविरोधात शेतकरी कामगार पक्षाचे बाळाराम पाटील असणार आहेत. त्यांनी उच्चशिक्षण घेतलेले आहे. कर्तबगार आहेत. पनवेलमध्ये विकासकामे केलेली आहेत. त्यांच्यापुढे आपले चिरजींव अगदीच खुजे वाटतात. याची जाणिव राम ठाकूर यांना होते आणि ते मुठी आवळायला सुरूवात करतात. त्यांनी मुठी आवळायला सुरूवात केली की काँग्रेसचे वक्ते गप्प बसतात.
   पण राहुल नार्वेकर आपल्या भाषणाला सुरूवात करताना मी डबल गँ्रज्युएट आहे. हिंदी, मराठी आणि इंग्रजी अशा तीनही भाषेतून बोलू शकतो. असे सांगितल्यावर राम ठाकूर यांचा चांगलाच तिळपापड होतो. कारण राम ठाकूर यांना इंग्रजी आणि हिंदी दोन्हीही येत नाही. प्रशांत ठाकूर यांना इंग्रजी येत नाही. राम ठाकूर सातवीपास तर चिरंजीव बारावीपर्यंत पोहोचलेले. राम ठाकूर यांच्या लहानपणी इंग्रजी आठवीपासून होते त्यामुळे त्यांना इंग्रजी येत नाही. हिंदी बोलायचे तर ‘भागते भागते धबागदिशी पड्या’ अशा पद्धतीचे त्यांचे बोलणे. त्यामुळे नार्वेकर जेव्हा मी तिनही भाषेत बोलू शकतो म्हणतात तेव्हा राम ठाकूर अक्षरशा व्यासपिठावर पाय आपटू लागतात. आपल्या जखमेवर मीठ चोळणार्‍या या नार्वेकरांना आता असा झोपवतो बघा असा पणच ते करतात. त्यात ज्यांच्यापुढे हे भाषण चाललेले असते ते सगळे ठाकूर इन्फ्रास्ट्रक्चरचे कर्मचारी असतात. म्हणजे ठिकठिकाणी सभेला वक्तेच नाही तर श्रोतेही घेवून जाण्याची दयनीय अवस्था काँग्रेसवर आलेली असते. या सगळ्या आपल्याच कर्मचार्‍यांसमोर आपला पाणउतारा होत असल्यामुळे निवडणुका होवू देत मग तुम्हा सगळ्यांकडे पाहतो अशा आवेशाने सगळ्या कामगारांकडे राम ठाकूर बघत असतात.
पण सगळ्यात गमतीची गोष्ट अशी की सगळीकडे वक्ते एकच आहेत पण समोर बसलेले श्रोतेही एकच आहेत याची जाणिव नार्वेकरांना झालेली नाही. अशा सभांमधून नार्वेकरांना मताधिक्य देण्याची भाषा राम ठाकूर करत आहेत, हा विनोदच नव्हे काय?
- धुरंधर