मराठी चित्रपटसृष्टीत चिरतारुण्याचे वरदान घेऊन आलेल्यांची एक साखळी आहे. त्यातला पहिला कलाकार म्हणजे सचिन पिळगांवकर. दुसरा स्वप्नील जोशी आणि त्याच परंपरेत गेल्या सात वर्षांपासून एक नाव जोडले गेले आहे, ते म्हणजे अमेय वाघ. हे कलाकार कधी आपली वयाची पंचवीशी ओलांडतच नाहीत. कायम तरुणच असतात. सचिनला मारून मुटकून कट्यार काळजात घुसलीमध्ये वयस्कर केला, ती भूमिका त्याने चांगली केलीही; पण त्याच्यातील तारुण्य तिथेही लपून राहिले नाही. स्वप्नील तर अजूनही बाळकृष्णच वाटावा. तसाच अमेय वाघ हा पण अजूनही शाळकरी फास्टर फेणे वाटावा असाच तरुण आहे. तो कधी मोठा होणार नाही. कलाकार म्हणून मोठा होईल; पण वयाने मोठा होणार नाही, या परंपरेतला तो आहे. तोच आता नव्याने कारटेल या वेब सिरीजमधून प्रेक्षकांच्या समोर येत आहे.
यापूर्वी अमेयने काही वेब सिरीज केल्या आहेत; पण कारटेलमधली त्याची भूमिका वेगळी आहे. त्यानिमित्ताने त्याच्याशी बोलण्याचा योग आला आणि या भूमिकेबद्दल त्याने भरभरून सांगितले. कारटेल ही १४ भागांची वेब सिरीज आहे. यात त्याची भूमिका धवल जाधव या नावाची आहे. तो एक पर्यावरणवादी असा आहे. नंतर राजकारणाकडे वळतो, अशी ती भूमिका आहे. या भूमिकेविषयी काही विशेष अभ्यास केला का? किंवा कोणता वर्तमानातील राजकारणातील, पर्यावरणाशी संबंधित युवा नेता डोळ्यापुढे ठेवला का, असे विचारले असता अत्यंत प्रांजळपणे अमेयने सांगितले की, असे काहीही नाही. मी फक्त माझ्या दिग्दर्शकांचे ऐकतो आणि ते सांगतील तशी भूमिका करतो. त्यांनी या भूमिकेचा इतका अभ्यास केलेला असतो की, मला वेगळे काही करावे लागत नाही. दिग्दर्शकाला सरेंडर करणे हे महत्त्वाचे असते. त्याप्रमाणे मी करत असतो. ही स्क्रीप्ट अत्यंत दमदार आहे, त्यामुळे मला ही भूमिका आवडली आहे.
अमेय वाघ म्हटल्यावर सर्वांना सर्वात आधी आठवतो तो २०१५ला आलेल्या दिल दोस्ती दुनियादारी या मालिकेतील कैवल्य. या भूमिकेतून तो प्रेक्षकांच्या विशेषत: मुलींचा लाडका नायक बनला होता. त्याची सहजता, संवादफेक, थोडासा बेफिकीर असा स्वभाव आणि त्याचे दिसणे सर्वांनाच आवडले होते. त्यामुळे त्याची तीच प्रतिमा अनेकांना कायम आवडली; पण अमेय वाघ हा सर्वच माध्यमातून यशस्वीपणे संचार करणारा कलाकार आहे.
नाटक किंवा रंगभूमी, छोटा पदडा किंवा टीव्ही आणि रुपेरी पडदा अर्थात चित्रपट ही सर्व माध्यमे यशस्वीपणे केल्यावर आता लोकप्रिय होत चाललेल्या ओटीटी प्लॅटफॉर्मवरही तो आपली छाप पाडण्यासाठी आतुर झालेला दिसतो. वेब सिरीजच्या माध्यमातून प्रेक्षकांच्या सानिध्यात राहू इच्छीतो. या सर्व माध्यमांमधून काम केल्यावरही नेमके कोणते माध्यम आवडते, असे विचारल्यावर अमेय वाघ दिलखुलासपणे सांगतो की, माझे सर्वात आवडते माध्यम हे नाटक आहे. रंगभूमीवर रोज नवनवे प्रयोग करता येतात, प्रेक्षकांची थेट वाहवा मिळते, अभिनयात जिवंतपणा येतो आणि तो टाळ्यांचा कडकडाट मिळतो, तेव्हा खरा आनंद मिळतो; पण आज कोरोनामुळे नाटकाचे प्रयोग होत नाहीत, ही खंत आहे. लवकरात लवकर हे कोरोनाचे संकट दूर होवो आणि पुन्हा प्रेक्षकांचे पाय नाट्यगृहाकडे वळावेत त्यांच्यासमोर नाटक साजरे करावे, अशी खूप मनापासून इच्छा आहे. आज रंगभूमीवरील कलाकार, बॅकस्टेज आर्टीस्ट यांचे यामुळे हाल होत आहेत, अनेकांचे आर्थिक गणित बिघडून गेले आहे, त्यामुळे लवकरात लवकर नाटक सुरू होणे आवश्यक आहे, असेही अमेयने बोलून दाखवले.
अमेय वाघ हा गेली तेरा वर्ष फिल्म इंडस्ट्रीमध्ये काम करतो आहे. जोशी की कांबळे, आईचा गोंधळ, बिल्लू, लागली पैज, अय्या, पोपट, शटर, घंटा, मुरंबा, फास्टर फेणे, हायजॅक, गर्लफ्रेंड, धुरळा, झोंबिवली असे त्याचे चित्रपट या काळात आले. मुरंबा या चित्रपटातील भूमिकेसाठी त्याला उत्कृष्ट अभिनयाचे फिल्म फेअर अ‍ॅवॉर्डही २०१८मध्ये मिळाले होते. तिशी ओलांडलेल्या वयात शाळकरी वयातील फास्टर फेणेच्या भूमिकेत तो प्रेक्षकांच्या समोर येतो, तेव्हा तो त्या भूमिकेसाठी इतका परफेक्ट वाटतो की, याच्याकडे वय थांबवण्याचे, काळाला थांबवण्याचे काही औषध आहे का? किंवा उलटी गिनती करत मागे जाण्याचा काही फॉर्म्युला आहे का, असे वाटल्या वाचून राहत नाही. झोंबिवली हा २०२१ मधला त्याचा प्रदर्शनाच्या प्रतिक्षेत असलेला महत्त्वाकांक्षी चित्रपट आहे; पण एकूणच आजवर अमेयने ज्या भूमिका केल्या आहेत त्या सिलेक्टेड अशाच आहेत.
झी मराठी वाहिनीवर सात वर्षांपूर्वी तुफान गाजलेल्या दिल दोस्ती दुनियादारीनंतर तर त्याने मागे वळून पाहिलेच नाही; पण छोट्या पडद्यावर फार काळ न अडकता त्याने वेब सिरीजकडे आपला मोर्चा वळवला. कास्टींग काऊच वुइथ अमेय अँड निपुण या वेब सिरीजमधून त्याने आपले वेगळेपण दाखवले. त्यानंतर बॉयगिरी या वेब सिरीजमध्ये तो चमकला. नेटफ्लिक्सच्या गाजलेल्या सिक्रेट गेम्सच्या दुसºया सीझनमध्ये अमेय वाघ चमकला. गेल्यावर्षी त्याने असूर या वेब सिरीजमधून प्रेक्षकांना दर्शन दिले होते. त्यानंतर आता तो कारटेलमधून प्रेक्षकांच्या समोर येत आहे.
२०१६नंतर अमर फोटो स्टुडिओ या नाटकाचे देशभरात अनेक प्रयोग झाले. या नाटकाने रंगमंचावरील त्याचा सहज आणि अफाट वावर प्रेक्षकांनी अनुभवला होता. मूळचा पुणेकर असल्यामुळे रंगमंचावरची आवड असणे स्वाभाविकच असते. पुणेकरांच्या पसंतीची पावती घेतल्यानंतर जगभरात सगळी पसंती मिळते, हा तर फॉर्म्युलाच. त्यामुळे पुण्यातला हा वाघ रंगभूमी, छोटा पडदा, रुपेरी पडदा, ओटीटी प्लॅटफॉर्मवर संचारताना दिसतो आहे. इस जंगल के हम हैंशेर म्हणत वावरणारा हा वाघ पुणेरी असला, तरी चिरतरुण गोंडसपणाचे वरदान घेऊन आलेला आहे.
प्रफुल्ल फडके/ द स्क्रीन
9152448055\\
कोणत्याही टिप्पण्‍या नाहीत:
टिप्पणी पोस्ट करा