कात टाकण्याचा प्रयत्न

आॅगस्ट महिन्याच्या दुसºया पंधरवड्यापासून झी मराठीने कात टाकण्याचा प्रयत्न सुरू केल्याचे दिसत आहे. तीन नव्या मालिका आणि एका जुन्या थांबलेल्या मालिकेचे पुनरागमन हे महत्त्वाचे पाऊल उचलून आपला घसरलेला टीआरपी सावरण्याच्या हालचाली केल्या आहेत. येत्या रविवारी रक्षाबंधनाच्या मुहूर्तावर स्वीटू ओमचे लग्न एकीकडे असतानाच या आठवड्यात ती परत आलीय ही नवी मालिका देवमाणूसच्या जागी सुरू झाली. तर त्यापाठोपाठ रात्रीस खेळ चाल-३चे पुनरुज्जीवन करण्यात आले आहे. देवमाणूस मालिकेने दोन तासांचा अखेरचा एपिसोड घेऊनही समाधानकारक शेवट झाला नाही, तर ती मालिका पुन्हा सुरू होण्याचा असंबद्ध संकेत देत मालिका संपवली. त्या जागी ती परत आलीय ही मालिका सोमवारपासून सुरू झाली.

आपल्याकडे हॉरर भयपटांच्या मालिका या ठराविक फॉर्ममध्येच का असतात हे समजत नाही. पूर्वीच्या काळात रामसे बंधू, मोहन भाकरी हे लोक ज्याप्रकारे एक ठराविक साचेबद्ध भयपट आणत त्याचप्रकारे ती परत आलीयचे कथानक दिसते. कॉलेजचे मित्र-मैत्रिणी एका फार्म हाऊसवर मस्ती करत असतात. यात एक साधीभोळी असलेली निलांबरी या मुलीला जबरदस्तीने पाण्यात उतरायला सांगितले जाते. तिची इच्छा नसताना हे मित्र तिला स्वीमिंग पूलमध्ये ढकलतात आणि त्यात ती बुडून मरते. त्यामुळे हे घाबरलेले आठ-दहा मित्र पुरावे नष्ट करून पळून जातात की लगेच आणि दहा वर्षांनंतर हे मोठे झालेले मित्र अचानक व्हॉट्सअ‍ॅप ग्रुपच्या माध्यमातून एकत्र येतात आणि एक गेट टुगेदर करण्याचे ठरवतात आणि एका फार्म हाऊसवर येतात. या फार्म हाऊसचा केअर टेकर विजय कदम दाखवला आहे, म्हणजे ज्याप्रकारे काही तरी करून तीन-चार जोडपी महाबळेश्वरमध्ये आणायची आणि एकेकाला मारायचे, असे रामसे बंधूंचे कथानक असायचे तसेच आता हे आठ-दहा मित्र-मैत्रिणी त्या फार्म हाऊसवर जमले आहेत. आता एकेकाचा बदला ती निलांबरीचे भूत घेणार हे स्पष्ट इथे दिसते आहे. त्यात घाबरवणे, भास, किंकाळ्या हे प्रकार रामसे फॉर्म्युल्याप्रमाणेचे दाखवले आहेत. विजय कदमचे पात्रही रामसेच्या चित्रपटात जगदीप किंवा कधी सदाशिव अमरापूरकरने केलेल्या पुराना मंदिर, हवेली या चित्रपटांप्रमाणेच घेतले आहे. विशेष म्हणजे दहा वर्षांनी भेटलेले हे मित्र चर्चा करताना हा व्हॉट्सअ‍ॅप ग्रुप कोणी बनवला याचा विचार करतात, तेव्हा आश्चर्याचा धक्काच बसतो, कारण हा ग्रुप कोणीच बनवलेला नसतो. तरीही सगळे अ‍ॅडमिन असतात. तो निलांबरीच्या भुताने बनवलेला असतो, म्हणजे आजकालची भुतेही किती टेक्नॉलॉजीत तरबेज आहेत, याचे प्रत्यंतर इथे येते. मालिकेला किती भागांना परवानगी मिळाली आहे तोपर्यंत हे भीतीचे किंकाळ्यांचे प्रकार दाखवत एकेकाचा बदला, खून होताना पहायला मिळेल. कोणा एकावर तरी संशय दाखवला जाईल आणि भुताचा मुखवटा घालून कोणी भलताच हे खून करेल, असे काही इथे दिसते. या पलीकडे आपल्याकडची भुतं काही करू शकत नाहीत हे दिसून येते.

मात्र रात्रीस खेळ चालेमधील भुतांनी तर उच्छाद मांडायचे आता ठरवले आहे. रात्री अकरा वाजता सुरू झालेल्या या मालिकेने प्रेक्षकांना थोडे उत्साही करण्याचा प्रयत्न केला आहे. रात्रीस खेळ चाले-३ ही मालिका सुरू झाल्यानंतर लॉकडाऊनमुळे महिनाभरात बंद पडली होती. त्याचे कथानक अत्यंत रंजक घेतले होते; पण आता पुन्हा ती पहिल्यापासून दाखवणे शक्य नसल्याने त्यातील काही भाग एडिट करून आणि नव्याने त्याचा शोध घेत ही मालिका सुरू झाली आहे. शेवंताचे अण्णांबरोबर संसार करण्याचे स्वप्न ती अण्णांना बोलून दाखवते; पण दोघांचे भटकते आत्मे असतात. त्यामुळे ते एकमेकांना स्पर्श करू शकत नाहीत. आता या आत्म्यांना शरीराची ओढ लागलेली आहे. त्यासाठी इंदूला घेऊन आलेले अभिराम आणि त्याची दुसरी बायको कावेरीच्या शरीरावर शेवंताचा डोळा आहे. इंदूने घराबाहेर काढल्यामुळे शेवंता कावेरीच्या शरीरात शिरून आपल्या इच्छा पूर्ण करण्यासाठी येते. आता अण्णांनी आपल्या इच्छा पूर्ण करण्यासाठी अभिरामचे शरीर घ्यायचे सोडून ते काही तरी करामती करणार. मागच्या भागात शेवंताने कावेरीचे शरीर घेतले होते, तर अण्णांनी सुषमाच्या नवºयाचे शरीर घेतले होते. त्यामुळे फारच गोंधळ उडाला होता. आता तिथपर्यंत नेत ही मालिका पुन्हा रंजक वळणावर आणली जाईल. दत्ता, माधव, छाया यांना आणून पुन्हा घर भरले जाईल. पांडूची एंट्री, तर झाली आहेच. भुताटकीचे बीज पहिल्याच भागात पांडूने रोवले आहे. त्यामुळे ही मालिका लवकर पकड घेईल आणि प्रेक्षकांना पुन्हा एकदा आनंद देईल यात शंका नाही. रात्रीस खेळ चाले-१पेक्षा रात्रीस खेळ चाले-२ अधिक चांगला होता. रात्रीस खेळ चाले-३ सहा महिन्यांपूर्वी सुरू झाली, तेव्हा ती त्याहून चांगली होणार, असे वाटत असतानाच लॉकडाऊनमुळे ती मालिका अचानक ठप्प झाली; पण हा कोंडमारा बाहेर काढत ही मालिका पुन्हा एकदा एका नव्या रंजक वळणावर येईल आणि प्रेक्षक रात्रीचे अकरा वाजण्याची वाट पाहतील यात शंकाच नाही; पण यामुळे झी मराठी वाहिनी कात टाकण्याचा प्रयत्न करत आहे हे नक्की.

छोटा पडदा/प्रफुल्ल फडके

9152448055\\